भोट त्यसलाई दिनुहोस्
जस्लाई दिएर पछि
आफैले आफैलाई जिस्क्याउँन नपरोस्
उसैका विरुद्ध साथीभाइ बिच्क्याउँन नपरोस् ।

भोट त्यसलाई दिनुहोस्
जस्लाई दिएर पछि
पटक पटक बिन्ती बिसाउँन नपरोस्
काम बनेन भनेर दाँत ङिच्याउँन नपरोस् ।

भोट त्यसलाई दिनुहोस्
जस्लाई दिएर पछि
‘म फलानो’ भनेर चिनाउँन नपरोस्
सिमाना हेर्न बोलाउँदा घिस्याउँन नपरोस् ।

भोट त्यसलाई दिनुहोस्
जस्लाई दिएर पछि
थाप्लो ठोकेर चिच्याउँन नपरोस्
धाउँदा धाउँदै उमेर सिध्याउान नपरोस् ।

भोट त्यसलाई दिनुहोस्
जस्लाई दिएर पछि
चिया खुवाएर रिझाउँन नपरोस्
ऊ छोटे राजा भन्दै उसैसित रिसाउँन नपरोस् ।

भोट त्यसलाई दिनुहोस्
जस्लाई दिएर पछि
समाजको आँखामा बिझाउन नपरोस्
भोट हाल्ने आफ्नै हात लोहोराले किच्याउन नपरोस् ।